«Қазынам бар қисапсыз шектеледі»

  Қазақ поэзиясы қашанда ұлы даналарымен, қарымды қаламгерлерінің құдыретімен асқақтап тұр. Солардың бірі – қазақтың қара өлеңін кие тұтқан, жүрегінің түбінен қайнап шыққан асыл жырларымен қалың жұртшылықтың ықыласына бөленген, поэзия тұлпары саналған ақиық ақын Мұқағали Мақатаев.

 Ақынның 85 жылдық мерейтойына орай орталық аудандық кітапханада   Қазынам бар қисапсыз шектеледі» атты поэзия кеші болып өтті. Мұқағали шығармашылығына, поэзияға деген сүйіспеншілікті ояту, ақын жайлы естеліктер айту мақсатын көздеген кештің шымылдығын №5 ЖББОМ-тің 10 сынып оқушылары Ғайнолла Биболат пен Ерғалиева  Әсемгүл «Арыз жазып кетейін»,  «Пай, пай өмір» өлеңдерімен ашты. Кеш барысында ақынның туып-өскен үйі, қолданған заттары, ұрпақтары, Мұқағали мұрасын насихаттаушылар, «Мұқағали» журналы жөнінде толық ақпарат бейнебаян арқылы интер тақтадан таныстырылды.

    Кеште ақынның «Махамбеттер, Абайлар» өлеңін Ақсай техникалық колледжінің 1 курс студенті А.Тілегенов, «Өмір сүрейік алмасып» өлеңін аудандық демалу орталығының театр әртісі З.Ерғалиева, №1 ЖББОМ-тің 8 сынып оқушылары А.Баймурзина мен А.Арманова «Ризамын», «Пай, пай өмір» өлеңдерін оқыса,  мұғалімдері А.М.Нахметова мен  Н.А.Ермекбаева «Шыда, шыда», «Күрсінбеші» өлеңдерін, №5 ЖББОМ-тің 10 сынып оқушысы Ә.Ерғалиева «Аққулар ұйықтағанда» поэмасын оқыса, 8 сынып оқушысы Г.Ізтілеуова «Жанарсыз адам келеді» өлеңін мәнерлеп жатқа оқыды. Жауһар  жыр иесінің  өлеңдеріне жазылған  «Фариза», «Арыз жазып кетейін», «Есіңе мені алғайсың» әндерін аудандық демалу орталығының әншілері Бірәнов Мұхит пен Какимов Айболат тамылжыта шырқады.  Қатысушы оқырмандар алғыс хаттармен марапатталды.

   «Мұқағали жырлары – ел-жұртының қасаңданып бара жатырған жан әлемін сәуле-шуағымен әрлендірер, қуат берер күші болып отырғаны шындық» деп ақын апамыз Фариза  Оңғарсынова  айтқандай, иә, жылдар өтер, әлі небір ақындар дүниеге келер, бірақ қара өлеңнің құдыретін аспанға көтерген Мұқағали Мақатаев есімі қашанда биіктен көрінері даусыз. Хантәңірінің биік шыңындай болған ақынның мұрасы мәңгі өшпек емес.